Breadcrumbs

Te Whakapōtaetanga ki te Marae

‘Ko te manu e kai ana i te mātauranga nōnā te ao!’

I te Rāpare te tekau mā rua o Haratua i tū ai te whakapōtaetanga ki  te marae o Te Kohinga Mārama, ā i whai parirau ngā manu ako kia rere ai rātou i te ao.  Ko ngā tauira ngērā i tūtuki i ngā tohu paetahi, i ngā tohu paerua me ngā tohu kairangi anō hoki. Ko tēnei te rangi o ngā rangi mō te whare wānanga whānui ka kite ka rongo ai hoki i ngā tino hua o te mahi ako me te tino pūtake, kaupapa o te wāhi nei arā ko te whāngai, te whai me te kai i te mātauranga.

E rua ngā tūmōmō whakapōtaetanga o te Whare Wānanga o Waikato, ko tētehi  ka tū ki te whare whakaari o Founders ki te taone ko tērā atu ka tū ki te Marae, ā he rerekē noa atu ngā mea e rua. Ko te mīharotanga me te motuhaketanga o te whakatū i ngā āhuatanga whakahirahira whēnei ki runga i te Marae,  ka noho āhuru te mahi a te tangata i ngā tikanga ā kui mā a koro mā i runga anō i te whakaaro me te wairua Māori. Pakaru ana te ātea i te kōrero, i te karanga, i te haka, i te waiata, i te rotarota, i te oriori me te waikamo hei whakamānawa, hei whakatairanga i te hunga nō rātou te rā arā ko ngā tauira me ngō rātou whānau.

Ahakoa tērā kei reira tonu ngā auētanga ki te taha o ngā kawa tapu o te pae, me reo Māori katoatia ngā whakahaere ki runga i te pae me aha kētia rānei! Ko te whakautu ki tērā kia reo Māori ahakoa te aha i roto i ngēnei āhuatanga kia kaua e tuku e whakaae kia rere ko reo kē hei kawenga mā a tātou tikanga Māori.  Koinā te wero nui ki a tātou katoa kia ora ai tō tātou reo kia kaua e noho tahanga ana e noho ngoikore ana rānei.

Read this article in English