Joeliee Seed-Pihama

Iwi: Taranaki, Te Atiawa, Ngaruahine, Waikato

Qualifications: BA (Hons), PGDipTrans&Inter, MA (Te Reo)

I tipu ake au i raro i te maru o te maunga titohea o Taranaki, ā, i tīmata taku whai i te reo Māori i reira engari kia whakaoti pai ai taku tohu BA i hūnuku mai au ki te riu o Waikato nei. Nō Ngāti Haua taku hoa rangatira, ā, tokotoru ā māua tamariki. I tōku ohinga kāore ōku taringa i tino rongo ki te hā o te reo, ko te take kāore ōku mātua i te matatau ki te reo. Ahakoa tēnā, me te tukituki o ngā waewae i ētehi wā, kua riro mai ngā hua o te rākau mātauranga ki a au, otirā, ki tōku whānau. Nā Te Pua Wānanga ki te Ao me ōna kaiako au tōku hinengaro, tōku ngākau me tōku arero i whāngai ki ngā āhuatanga o te ao Māori. Ko te tino hua pea ko āku tamariki; ko tā rātou kai i te ao i te pō ko ngā āhuatanga papai o te ao Māori me tōna reo whakamiharo. Ki a au nei, kāore he hua, kāore he painga i tua atu i tēnā, arā, ko te tū hei tōtara haemata i roto i te wao nui a Tāne me te ao whānui hoki.

Ko te kōingo o te ngākau mō ngā rā kei te heke tonu mai, kia tū au hei pou mō tōku whānau, ka mutu kia hikoi tonu au i runga i te ara o rangahau; he mea hiamo ki a au te rapu mātauranga hei painga mō te iwi. Nā reira, ko te tūmanako, mā tēnei ara rangahau au e tautoko i ōku hapū me ōku iwi ki te whakatinana i ō mātou ake wawata mō āpōpō.

Current employment: I tēnei wā kei te whai au i taku tohu kairangi. Ko ‘ngā ingoa Māori’ te kaupapa, me kī, kei te āta titiro au ki tēnei mea te tapatapa i ā tātou nei tamariki i roto i te reo Māori. Nā reira, kua uiuia e au ētahi o ōku whanaunga kia kite ai he aha tēnei mea te ingoa ki a mātou o Taranaki, o Waikato hoki. He nui te mana me te tapu o te ingoa ki a Ngāi Māori; mā te ingoa e whakatakoto te ara hei hikoinga mā te tamaiti, ā, i te mutunga iho me ara ake tātou ki te whakanui i ō tātou ingoa me tō tātou reo rangatira.